Les mots surlignés font l'objet d'une note
1Reçue à Grenoble, le 03 mars 1573.
2Monsieur, ilia six jours que je vous escripvis par ung muletier d’Apt.
3Despuys jay esté à Saix [=Aix-en-Provence] pour les estatz qui ont duré huict jours
4les comunes ont doné à monsieur le mareschal de Tavanes douse
5mil livres, huict mil à monsieur le conte de Carcès, six cens à ung
6maitre de requeste de lhostel de Monsieur qui estoit venu
7pour fère enregistrer et publier le pouveir dudit sieur
8mareschal, quatre cens à son sevrettère et cent à celuy dudit
9seigneur de Carcès. Monsieur D’Entrecastraut a 10 livres tournois par tout
10acompaigné du sieur de St Estienne aultrement le terme, Rogiers
11à VIII livres, lavocat Macgaillet a VII livres, quattre comunes à
12IIII livres chesqune. Par tout sont esté deputtés pour aller feliciter
13et fère la reverance à monseigneur le mareschal de
14Tavannes et luy recommander les affères de ce povre pays.
15Oultre ce, ilz ont envoyé expressement et en diligence devers sa
16magesté pour le supplier très humblement se contenter que
17monsieur de Carcès, lequel avoyt heu troys jours auparavant
18lettres dicele pour se rendre avec le plus de la noblesse de ce
19pays quil pourroyt près monseigneur le mareschal de
20Dampvile pour lacister en ce qui se presentoyt du
21costé du Languedoc, mesmes contre ceus de Nismes si
22les affaires de ceste province le permetoyt. Je vous puys asseurer
23que quelque gentilhome quil heust sceu laisser en sa
24place coment le roy luy ordonoyt, il est à craindre quil
25ni eust heu du remuement. Lon le supplie aynsi de laisser
26en ces pays lune les quattre compaignies denfenterie qui i ont
27esté levées et paiés pour troys moys pour les affaires du Languedoc
28demeure icy pour les garnisons de XX homes de Cisteron, part à
29Grinhan, et III à Tarasquon et le re [sic] reste pour la seurete du pays. Le
30reste de ladite despeiche pour scavoir de sa magesté ce quele entent quil
31soyt faict du fils de feu monsieur ladmirailz que Rogiers leiné [=l’ainé]
32a prins charge conduire en ce pays pour le mettre à St Victor lez Marseilhe
33où lon ne la point volu recepvoir et ausi par monsieur de Moneilles
34a la garde. Il ma dit ne men avoir volu presser pour le mettre
35au chateau d’If. Jentens que le dit Rogiers en a heu VI c[ent] écus pour le
36conduire pardeça que luy sont venus bien à propos pour sourtir de
37Paris. Il est à sa maison à Saix avec quelque garde de leur aige
38coment lon ma dit de neuf ans je ne lay point veu. Monsieur
39de [Veins] après avoir esté recherché de venir à Saix pour estre sur
40la mort de sesdits frères apelés Fabres du lieu de Signe qui furent
41tués la poursuivant pour le constituer prisonnier entre les meins de la
42justice et yant faict difficulté dialer[=d’y aller], a heu ung
43ajournement personnel pour les causes resultantes du procès criminel
44des aultres qui furent lhors prins qui sestoint trouvés an
45ravange de leur maison du dit sieur de Vains, mays non pas faulte [sursoir]
46[152 v°] aucuns. Je croy quil en sera demain depaisché. Lon en a aultant faict
47à Ferrier et pour mesme effect. Ceste despesche pour mon regard est
48pour, sil vous plaist, comander quon rende ung pacquet à monsieur
49d’Anières mon filhs, que mon frère monsieur le conseiller luy adresse pour
50touchant Chateauneuf de [Charlomet]. Luy et moy avons veu [lectre]
52à ce que tantaut vous ne serés pas encores en ce pays par ce que monsieur
53d’Apt a dit à ma femme à Sapt par laquele monsieur de St Sernin
54a adverti de ceste comodité. Pour cest endroyt, je salue voz bones
55graces et celes de madame de Gordes de mes très humbles recommendations.
56Jen dis de mesmes à monsieur de [Burache] et prie le Createur vous
57doner,
58monsieur, très bone, longue, heureuse et contente vie avec
59les siennes très sainctes. De La Coste, ce XXIIIIe de febvrier 1573.
60Votre très humble cousin et affectioné serviteur.
61Il est passé par ces mers troys nefz chargées de neuf cens soldatz quon a tragetté
62d’Italie ou Espagne et attant lon bien tost le passaige de XVII galères que sont à
63Gênes toutes prestes, chargés ausi denfenterie. Lon tient que cest tout pour lemtrepri
64se d’Argiers. Ilia dejà quelques jours que je nay veu madamoiselle de Caseneufve, ni sa
65petite trouppe. Mays lon mavertit quele est en fort bonne sancté et trop meilleure
66quon navoyt volu dire, naiant ele ny aucungs de siens heu tant soyt peu de vie.